Skákdagurinn 2012 - til heiðurs Friðriki Ólafssyni

Föstudagur, 27. janúar 2012 12:52

gudbjlaraEftirfarandi barst frá Baldri Garðarssyni, sem hafði veg og vanda af* skákmóti dagsins:

Upplýsi hér með að nemendafélagið auglýsti skákmót, sem var svo haldið, þáttaka hefði mátt vera meiri, en sigurvegari eftir bráðabana við Klemens Óla Sigurbjörnsson, varð Guðbjörg Lára Vernharðsdóttir í 1. N. Efnilegur skákmaður þar á ferð, teflir þungan rússneskan stíl að hætti Artúrs Júsopovs, enda keppir hún með loðhúfu. Það sjást nánast plógförin á taflborðinu eftir skákina, það er smám saman valtað yfir andstæðinginn án þess að hann átti sig beinlínis á því hvenær hann gerði mistökin. Klemens fann engar vinningsleiðir og lenti manni undir eftir langa stöðubaráttu. 

BG/pms

*sérstaklega var rannsakað hvort hér skyldi ritað af eða að og niðurstaðan varð sú, að AF er upprunalegra og því réttara.

 

Máttur nútíma fjölmiðlunar

Föstudagur, 27. janúar 2012 11:33

trodsnjorÞað var slíkt álagið á vef skólans í gær, að hann datt nánast úr á tímabili. Ástæðuna má rekja til lítillar fréttar í tengslum við veðrið hér á Laugarvatni í gærmorgun og afleiðingar þess. Með fréttinni var mynd sem var tekin þegar íbúarnir í Tröð ætluðu að gá til veðurs, en sáu augljóslega ekki til þess, þar sem skafl hafði lagst þétt upp að útidyrunum. 

Fréttin fór í loftið og þá tók dreifikerfið við. Einhver einstaklingur smellir á LIKE hnappinn og þar með birtist tilvísun í vef skólans á fasbókarsíðu hans. Með þessu fór snjóboltinn að rúlla og í gærkvöld voru tæplega 800 manns búnir að smella á LIKE hnappinn, og þegar þetta er ritað hafa ríflega 18000 lesið fréttina.  Þetta var nú bara toppurinn á ísjakanum, því nú er svo komið að Ægir Freyr er kominn í mikið uppáhald hjá grískum meyjum, reyndar meyjum vítt og breitt um veröld alla. Á þessari síðu lenti myndin og þar hefur ótölulegur fjöldi fólks tjáð sig um  og lýst ánægju sinni með: piltinn sem slíkan, fatnaðinn sem hann er í, og loks snjóinn sem fyllir út í dyragættina, sem margir telja reyndar að sé gabb. 

Vefstjóri skellti sér út blíðviðrið sem nú er á Laugarvatni og myndaði staðinn þar sem hin heimsfræga mynd er tekin, utanfrá. Það hafa nú verið grafin göng að dyrunum. Það var hinsvegar aldrei spurning um að þeir kæmust út, félagarnir.

pms

Fleiri myndir frá Laugarvatni í dag, eru á myndasíðunni.

 

Ekki leiður yfir stöðunni?

Fimmtudagur, 26. janúar 2012 12:41

snjotrodÞað er afskaplega sjaldgæft að starfsemi skólans falli niður, enda nánast allir nemendur á heimavistum, þar sem annaðhvort er innangengt í skólahúsið eða um er að ræða um 50 metra göngu til að komast í skólann. Þá búa flestir starfsmenn í vel viðunandi fjarlægð frá skólahúsinu. Nokkrir starfsmenn, sem skipta vissulega talsverðu máli í þessu öllu saman, eiga um lengri leið að fara.

Í morgun reyndist ekki um annað að ræða en fresta skólahaldi þar til veðri slotaði, sem nú hefur gerst og skólahald hefst kl. 13:00, samkvæmt stundaskrá.

Þeir Hannes Þ Öfjörð (tók myndina) og Ægir Freyr Hallgrímsson (sést á myndinni), búa í Tröð. Þegar þeir hugðust bregða sér í skólann í morgun var staðan, þegar útidyrnar voru opnaðar, eins og sjá má á myndinni.

pms

 

Fleiri greinar...

Síða 1 af 45