Í síðustu viku lagði annar bekkur land undir fót og fór í íslenskuferðalag. Ferðin hófst í Skálholti þar sem sr. Egill Hallgrímsson tók vel á móti ML-ingum. Hann sagði frá sögu staðarins, fór yfir helstu merkismenn Skálholtsstaðar, sýndi hópnum ýmsa merka muni í kirkjunni og í safni hennar. Loks var gengið um nánasta umhverfi. Sr Agli eru færðar kærar þakkir fyrir góðar móttökur.
Frá Skálholti var haldið á Selfoss þar sem beið pizzuhlaðborð á Pizza Islandia. Eftir að hafa sporðrennt nokkrum sneiðum var haldið á Álfasafnið og Draugasetrið á Stokkseyri þar sem nemendur komust í kynni við álfa, tröll, drauga og annað huldufólk. Nokkur draugagangur var á safninu og hrukku þó nokkrir nemendur í kút. Að lokum hélt hópurinn, sæll og glaður, heim á Laugarvatn. Myndir úr ferðinni má finna á myndasíðunni. Það má með sanni segja að dagurinn hafi heppnast afar vel og voru nemendur skólanum til sóma.
Aðalbjörg Bragadóttir, íslenskukennari.
