Á kanó á HólaáNemendur í útivist 272 kláruðu verklega hluta námskeiðsins helgina 25. – 27. apríl þegar þeir sigldu á kanó og kayak frá Laugarvatni um Hólaá og yfir í Apavatn í þremur hópum. Fyrsti hópurinn lagði af stað undir handleiðslu Helgu og Óla útivistarkennara ásamt Pálma húsverði á föstudag í blíðskaparveðri. Pálmi hélt stuttan fyrirlestur um öryggi og framkomu áður en lagt var af stað, en nemendur höfðu fengið fyrirlestur og leiðbeiningar í kennslustund deginum áður. Róið var meðfram bökkum Laugarvatns að bragga í landi Úteyjar þar sem áð var og fengu nemendur sér nesti. Þaðan var svo róið í Hólaá en undir Laugardalshólum var aftur áð, nemendur kláruðu nestið og söfnuðu orku fyrir síðasta hluta ferðarinnar. Veðrið lék við okkur mest alla leiðina en í lok ferðar fengum við úrhelli og urðu nemendur og kennarar þó nokkuð blautir. Ferðin gekk að öðru leyti vel og komust allir óhultir í land við bakka Apavatns. Þar sótti Bjarni Daníelsson skólabílstjóri og björgunarsveitarmaður nemendur ásamt bátum og keyrði heim.

Á sunnudag fóru tveir hópar eftir sömu áætlun. Veðrið var gott en þó nokkuð mikill vindur. Nokkuð þungur róður var í fyrsta áfanga ferðarinnar en nemendur stóðu sig afar vel og tóku ölduganginn á hörkunni einni saman. Allir voru jákvæðir og létu ekki rok og þunga strauma stoppa sig. Bjarni Daníelsson var aftur í hlutverki bílstjóra en í seinni ferð tók hann við hlutverki leiðbeinenda og réri með nemendum þar sem Helga átti við gömul axlarmeiðsli að stríða.  Helga fylgdi þó nemendum af stað, tók á móti þeim við áninguna í Hólaá og í lokin við Apavatn. Þrátt fyrir öldugang og þunga strauma komust hóparnir heilir í land án þess að velta og voru jafnvel einhverjir nemendur svolítið sólbrunnir á nefinu eftir daginn.

Allir hóparnir stóðu sig með sóma og sýndu umhverfi sínu, kennrurum og öðrum nemendum mikla tillitssemi. Fuglalífið við vatnið og í Hólaá er fjölbreytt og mátti sjá bæði straumendur og álftir spóka sig við vatnið og í ánni. Það var því nóg að skoða og njóta í ferðunum sem tóku um 3 tíma í það heila. Hóparnir voru góðir, allir jákvæðir og flestir nokkuð ánægðir með ferðirnar sem gerðu þær ánægjulegri fyrir vikið.

Með kveðju, Helga Kristín Sæbjörnsdóttir kennari útivistar 272.

MYNDIR

Viltu deila...
Share on Facebook
Facebook
Tweet about this on Twitter
Twitter