Nemendur í 2. bekk fóru í Njáluferð á dögunum. Með í för voru Elín Una íslenskukennari og Óskar H. Ólafsson, fyrrverandi sögukennari skólans. Óskar sem kominn er hátt á níræðisaldur fór létt með leiðsögnina enda hefur hann farið í ótal Njáluferðir með nemendum skólans. Að vanda fór hann blaðlaust með ljóðið Gunnarshólma eins og hann leggur sig og varð hvergi fótaskortur á tungunni þrátt fyrir slæman vegarkafla fram hjá Rauðuskriðum!

Áð var á helstu sögustöðum þar sem nemendur m.a. léku og túlkuðu atburði bókarinnar með glensi og innlifun.  Við Gunnarsstein börðust Gunnar, Kolskeggur og Hjörtur við þrjátíu menn (en felldu samt fjórtán!) og í Sögusetrinu á Hvolsvelli hreyttu Hallgerður og Bergþóra fúkyrðum hvor í aðra! Á bæjarhólnum á Bergþórshvoli vakti reiðinnar býsn af kindataði einkum athygli nemenda.

Veðrið lék við ferðalanga þennan dag og virtust allir skemmta sér vel. Hér eru myndir úr ferðinni.

Elín Una Jónsdóttir

Viltu deila...
Share on Facebook
Facebook
Tweet about this on Twitter
Twitter